გალაკტიონის უბის წიგნაკში ვკითხულობთ: ,,სახლი უნდა იყოს ორსართულიანი ქართული სტილის, რაც შეიძლება მაღალი. იდეა მიქელანჯელოსი - სიმაღლის იდეა". აფხაზეთის საზოგადოება მის შემოქმედებას დიდ პატივს სცემდა. სოხუმში გალაკტიონისადმი მიძღვნილი საღამოები ტარდებოდა, მის ლექსებს საჯაროდ კითხულობდნენ.
გიორგი ლეონიძის სახელობის ქართული ლიტერატურის სახელმწიფო მუზეუმში გალაკტიონ ტაბიძის არქივში დაცულია საინტერესო ფოტომასალა, რომელიც პოეტის აფხაზეთში ყოფნის პერიოდს ასახავს. ყველაზე ადრეულია 1927 წლის 27 მარტით დათარიღებული ფოტო, რომელზეც გალაკტიონი სოხუმის დრამატული წრის წევრებსა და ცნობილ მსახიობ და პედაგოგ ელო ანდრონიკაშვილთან ერთად არის გადაღებული. ამ წელს, 2 აპრილს, სოხუმში გალაკტიონ ტაბიძისადმი მიძღვნილი საღამო ჩატარდა. აქვეა დაცული აფხაზ მწერლებთან ერთად გადაღებული ფოტოები: დიმიტრი გულუასთან, ხუხუტი ბღაჟბასთან, ბაგრატ შინკუბასთან, ასევე, აფხაზეთის მასწავლებლებთან, მეცნიერებთან და სხვა.
