ილიას სახელმწიფო უნივერსიტეტში პედაგოგთა მომზადების საუნივერსიტეტო პროგრამების პრეზენტაცია გაიმართა, რომელსაც საქართველოს განათლებისა და მეცნიერების მინისტრი თამარ სანიკიძე, უნივერსიტეტების რექტორები და პროფესორები ეწრებოდნენ.
პრეზენტაციაზე წარმოდგენილი იყო ორი პროგრამა - ერთი საბაკალავროსთან შერწყმული სამაგისტრო პროგრამა და მეორე 60-კრედიტიანი ერთწლიანი პროგრამა, მათთვის, ვისაც აქვს უმაღლესი განათლება, თუმცა, არა პედაგოგიური. განათლებისა და მეცნიერების მინისტრმა პროგრამების დანერგვის ირგვლივ არსებულ შესაძლო რისკზე ისაუბრა:
,,ზოგადად, ვერ ვხედავ რისკს, გარდა იმისა, რაც დაკავშირებულია სიახლის დანერგვასთან. ერთადერთი რისკი მხოლოდ ეს არის. თუმცა, მნიშვნელოვანია ის, თუ როგორ მიიღებს მას პედაგოგი ან ჩვენ როგორ მივაწვდით მას" - განაცხადა თამარ სანიკიძემ.
,,დიდი გამოწვევის წინაშე დგას უნივერსიტეტი და, ზოგადად, სახელმწიფო. პრობლემა შეიძლება შეიქმნას რეგიონებში არსებულ უნივერსიტეტებში. ამიტომ მიმაჩნია, რომ რეგიონულ ფაქტორებს თუ გაითვალისწინებენ, ძალიან მნიშვნელოვანი იქნება" - აღნიშნა სამცხე-ჯავახეთის სახელმწიფო უნივერსიტეტის რექტორმა გულიკო ბექაურმა.
ახალი საუნივერსიტეტო პროგრამების ამოქმედება საქართველოს ზოგადსაგანმანათლებლო დაწესებულებებში მაღალკვალიფიცირებული კადრების მიზიდვას ისახავს მიზნად.